TV సౌండ్ తగ్గించమన్న పాపానికి.. భర్తను కత్తితో పొడిచి చంపిన భార్య!
21/February/2026 07:59
Share:
క్రైమ్ అనాలసిస్: A. Srinivasa Rao, మంగళగిరిలో కలకలం రేపిన దారుణ ఘటన గుంటూరు (మంగళగిరి): కుటుంబంలో తలెత్తిన చిన్నపాటి వివాదం.. క్షణికావేశంలో ఓ నిండు ప్రాణాన్ని బలితీసుకుంది. ఇంట్లో టీవీ సౌండ్ ఎక్కువగా ఉందని, కాస్త తగ్గించమని అడిగిన పాపానికి ఓ భార్య కన్నెర్రజేసింది. విచక్షణ కోల్పోయి ఏకంగా కత్తితో దాడి చేసి భర్తను దారుణంగా హతమార్చింది. గుంటూరు జిల్లా మంగళగిరిలో గురువారం చోటుచేసుకున్న ఈ ఉదంతం స్థానికంగా తీవ్ర కలకలం రేపింది. పోలీసులు, స్థానికులు తెలిపిన వివరాల ప్రకారం ఈ దారుణానికి సంబంధించిన పూర్తి వివరాలు ఇలా ఉన్నాయి. మంగళగిరి మండలం పెదవడ్లపూడి గ్రామానికి చెందిన షేక్ అహ్మద్ (26) వృత్తిరీత్యా ఏసీ మెకానిక్గా పనిచేస్తూ జీవనం సాగిస్తున్నాడు. దాదాపు ఏడాదిన్నర క్రితం మంగళగిరికే చెందిన 'క్రాంతి' అనే మహిళతో అతనికి పరిచయం ఏర్పడింది. ఆ పరిచయం కాస్తా కొన్నాళ్లకు వివాహేతర సంబంధానికి దారితీసింది.అయితే, క్రాంతికి అప్పటికే వివాహమైంది. ఆమె మొదటి భర్త ఓ క్రిమినల్ కేసులో చిక్కుకుని ప్రస్తుతం జైలు శిక్ష అనుభవిస్తున్నాడు. ఈ క్రమంలోనే అహ్మద్, క్రాంతిలు తమ బంధాన్ని మరింత ముందుకు తీసుకెళ్లి వివాహం చేసుకున్నారు. పెళ్లయిన నాటి నుంచి వీరు మంగళగిరిలోని టిడ్కో ఇళ్ల సముదాయంలో (బీ-16 బ్లాకులో) నివాసం ఉంటున్నారు. ప్రారంభంలో సాఫీగానే సాగిన వీరి కాపురంలో క్రమంగా మనస్పర్థలు మొదలయ్యాయి. చిన్నచిన్న కారణాలకే ఇద్దరి మధ్య తరచూ తీవ్ర స్థాయిలో వాగ్వాదాలు, గొడవలు జరుగుతూ ఉండేవి. ప్రాణం తీసిన 'టీవీ సౌండ్' ప్రస్తుతం పవిత్ర రంజాన్ మాసం నడుస్తుండటంతో అహ్మద్ ఉపవాస దీక్షలో ఉన్నాడు. గురువారం మధ్యాహ్నం పని ముగించుకుని, అలసటతో ఇంటికి చేరుకున్నాడు. ఆ సమయంలో ఇంట్లో ఉన్న క్రాంతి టీవీ వాల్యూమ్ పెంచుకుని కార్యక్రమాలు చూస్తోంది. ఉపవాస దీక్షలో ఉండి, నీరసంగా ఇంటికి వచ్చిన అహ్మద్.. టీవీ సౌండ్ ఎక్కువగా ఉండటంతో చిరాకు పడ్డాడు. "టీవీ సౌండ్ కాస్త తగ్గించు" అని భార్యకు సూచించాడు.ఈ చిన్న మాట వారి మధ్య పెద్ద చిచ్చురేపింది. అహ్మద్ మాటలతో తీవ్ర ఆగ్రహానికి లోనైన క్రాంతి, విచక్షణ కోల్పోయి ఇంట్లో ఉన్న కత్తి తీసుకుని భర్తపై విచక్షణారహితంగా దాడి చేసింది. కత్తిపోట్లకు గురైన అహ్మద్ తీవ్ర రక్తస్రావంతో అక్కడికక్కడే కుప్పకూలిపోయాడు. ఇంట్లో జరుగుతున్న గొడవ, అహ్మద్ ఆర్తనాదాలు విన్న ఇరుగుపొరుగు వారు వెంటనే అక్కడికి చేరుకున్నారు. రక్తపు మడుగులో ఉన్న అహ్మద్ను చూసి దిగ్భ్రాంతికి గురయ్యారు. ఏమాత్రం ఆలస్యం చేయకుండా ప్రాణాపాయ స్థితిలో ఉన్న అతడిని స్థానికంగా ఉన్న చినకాకాని ప్రైవేట్ ఆస్పత్రికి తరలించారు. ప్రథమ చికిత్స అందించిన వైద్యులు, పరిస్థితి విషమంగా ఉండటంతో మెరుగైన వైద్యం కోసం విజయవాడలోని ప్రభుత్వ ఆస్పత్రికి తీసుకెళ్లాలని సూచించారు. దీంతో బాధితుడిని హుటాహుటిన విజయవాడ తరలిస్తుండగా.. మార్గమధ్యలోనే అహ్మద్ తుదిశ్వాస విడిచినట్లు పోలీసులు నిర్ధారించారు. కేసు నమోదు - దర్యాప్తు ముమ్మరం ఒక్కగానొక్క కొడుకు దారుణ హత్యకు గురికావడంతో అహ్మద్ తల్లి మహాబీ కన్నీరుమున్నీరుగా విలపిస్తున్నారు. ఆమె ఇచ్చిన ఫిర్యాదు మేరకు మంగళగిరి తాలూకా పోలీసులు కేసు నమోదు చేసుకున్నారు.నిందితురాలు క్రాంతిని అదుపులోకి తీసుకున్నట్లు సమాచారం.ఘటనా స్థలాన్ని పరిశీలించిన మంగళగిరి పట్టణ సీఐ కె.వీరాస్వామి, కేసు నమోదు చేసి అన్ని కోణాల్లో దర్యాప్తు చేస్తున్నట్లు వెల్లడించారు.
