ఢాకా: బంగ్లాదేశ్లో తట్టు వ్యాధి (Measles) కోరలు చాస్తోంది. గత కొన్ని రోజులుగా ఈ మహమ్మారి తీవ్రంగా ప్రబలడంతో దేశవ్యాప్తంగా ఇప్పటివరకు 118 మంది మరణించినట్లు ఆరోగ్య శాఖ అధికారులు వెల్లడించారు. మరణించిన వారిలో అత్యధికులు చిన్నారులే ఉండటం ఆందోళన కలిగిస్తోంది.
డైరెక్టరేట్ జనరల్ ఆఫ్ హెల్త్ సర్వీసెస్ (DGHS) విడుదల చేసిన గణాంకాల ప్రకారం, మార్చి 15 నుండి ఈ మరణాలు సంభవించాయి. గడిచిన 24 గంటల వ్యవధిలోనే ఐదుగురు చిన్నారులు ప్రాణాలు కోల్పోయారు. ప్రస్తుతం దేశవ్యాప్తంగా వివిధ ఆసుపత్రులలో 2006 మంది తట్టు లక్షణాలతో చికిత్స పొందుతున్నారు. బాధితుల్లో మెజారిటీ పసిపిల్లలేనని, వారికి అత్యవసర వైద్య సేవలు అందిస్తున్నామని అధికారులు తెలిపారు.
వ్యాధి వ్యాప్తిని అరికట్టేందుకు ప్రభుత్వం ముందస్తు చర్యలు చేపట్టింది. ప్రభావిత ప్రాంతాల్లో వ్యాక్సినేషన్ ప్రక్రియను వేగవంతం చేయాలని ఆరోగ్య శాఖ ఆదేశించింది. తల్లిదండ్రులు తమ పిల్లల పట్ల అప్రమత్తంగా ఉండాలని, తట్టు లక్షణాలు కనిపిస్తే వెంటనే సమీపంలోని ఆసుపత్రికి తరలించాలని వైద్యులు సూచిస్తున్నారు.
