అనకాపల్లి: మెగా డీఎస్సీ నియామకాల్లో అవకతవకలు జరిగాయని ఆరోపిస్తూ, దీనిపై సీబీఐతో సమగ్ర విచారణ జరిపించాలని డిమాండ్ చేస్తూ వైఎస్సార్సీపీ విద్యార్థి, యువజన విభాగాల ఆధ్వర్యంలో సోమవారం అనకాపల్లిలో భారీ నిరసన ర్యాలీ నిర్వహించారు. మాజీ ముఖ్యమంత్రి వై.ఎస్. జగన్మోహన్ రెడ్డి ఆదేశాల మేరకు చేపట్టిన ఈ ర్యాలీ రామచంద్ర థియేటర్ జంక్షన్ నుంచి ప్రారంభమై పెరుగు బజారు వరకు శాంతియుతంగా సాగింది. ఈ సందర్భంగా నాయకులు మాట్లాడుతూ.. మెగా డీఎస్సీ నియామక ప్రక్రియలో చోటుచేసుకున్నట్లు ఆరోపణలు వస్తున్న అవకతవకలపై సీబీఐ విచారణ జరిపించాలని ప్రభుత్వాన్ని డిమాండ్ చేశారు. ప్రధాన డిమాండ్లు: మెగా డీఎస్సీ: నియామకాల్లో జరిగినట్లు చెబుతున్న అక్రమాలపై సీబీఐ విచారణ.ఫీజు రీయింబర్స్మెంట్: విద్యార్థులకు పెండింగ్లో ఉన్న ఫీజు రీయింబర్స్మెంట్ మరియు వసతి దీవెన బకాయిల తక్షణ విడుదల.నిరుద్యోగ భృతి: ఎన్నికల సమయంలో ఇచ్చిన హామీ మేరకు నిరుద్యోగ భృతి అమలు.నైతిక బాధ్యత: విద్యాశాఖ మంత్రి నారా లోకేష్ తన పదవికి రాజీనామా చేయాలని డిమాండ్. ఈ కార్యక్రమంలో అనకాపల్లి పట్టణ ఇన్చార్జి బొడ్డేడ ప్రసాద్, పెందుర్తి నియోజకవర్గ ఎమ్మెల్యే అదీప్ రాజ్, తూర్పు గోదావరి జిల్లా ఇన్చార్జి, మాజీ మంత్రి గుడివాడ అమర్నాథ్, వైఎస్సార్సీపీ సమన్వయకర్తలు మంతపాటి జానకిరామరాజు, జాజుల రమేష్తో పాటు పార్టీ నాయకులు, విద్యార్థి, యువజన విభాగాల కార్యకర్తలు పెద్ద సంఖ్యలో పాల్గొన్నారు. శాంతియుతంగా ర్యాలీ నిర్వహించి తమ డిమాండ్లతో కూడిన వినతిపత్రాన్ని అందజేశారు. శ్రీనివాస్ అప్పికొండ, క్రైమ్ ఎనాలసిస్ జిల్లా ఇంచార్జ్
