ఏలూరు జిల్లా పంచాయతీ అధికారిగా,బాధ్యతలు స్వీకరించిన శ్రీ జి.వి.కె. మల్లికార్జున రావు

కొండల ప్రసాద్ CA న్యూస్ ఇంచార్జి, ఏలూరు.
ఏలూరు జిల్లా పంచాయతీ అధికారిగా (District Panchayat Officer) నూతనంగా పదవీ బాధ్యతలు స్వీకరించిన శ్రీ జి.వి.కె. మల్లికార్జున రావు గారు ఈ రోజు ఉమ్మడి పశ్చిమ గోదావరి జిల్లా పరిషత్ చైర్‌పర్సన్ శ్రీమతి ఘంటా పద్మశ్రీ గారిని వారి కార్యాలయంలో మర్యాదపూర్వకంగా కలిశారు.ఈ సందర్భంగా శ్రీ మల్లికార్జున రావు గారు చైర్‌పర్సన్ శ్రీమతి ఘంటా పద్మశ్రీ గారికి పూల మొక్కను అందజేసి శుభాకాంక్షలు తెలిపారు. అనంతరం జిల్లాలో గ్రామీణాభివృద్ధి, పంచాయతీరాజ్ వ్యవస్థ బలోపేతం, గ్రామ పంచాయతీలలో మౌలిక వసతుల అభివృద్ధి, పారిశుద్ధ్య నిర్వహణ, తాగునీటి సరఫరా, హరితహారం, గ్రామాల పరిశుభ్రత, ప్రభుత్వ అభివృద్ధి కార్యక్రమాల అమలు తదితర అంశాలపై విస్తృతంగా చర్చించారు.
ఈ సందర్భంగా చైర్‌పర్సన్ శ్రీమతి ఘంటా పద్మశ్రీ గారు మాట్లాడుతూ, గ్రామ పంచాయతీలు గ్రామీణాభివృద్ధికి మూల స్తంభాలుగా నిలుస్తాయని పేర్కొన్నారు. గ్రామాల సమగ్రాభివృద్ధికి అధికారులు, ప్రజాప్రతినిధులు పరస్పర సహకారంతో పనిచేయాల్సిన అవసరం ఉందన్నారు. ప్రభుత్వం ప్రతిష్టాత్మకంగా అమలు చేస్తున్న సంక్షేమ, అభివృద్ధి కార్యక్రమాలు ప్రజలకు పూర్తిస్థాయిలో చేరేలా ప్రత్యేక శ్రద్ధ తీసుకోవాలని సూచించారు.
అలాగే గ్రామ పంచాయతీలలో పారిశుద్ధ్యం, చెత్త నిర్వహణ, తాగునీటి సమస్యల పరిష్కారం, వీధి దీపాల నిర్వహణ, గ్రామాల్లో పచ్చదనం పెంపు, మౌలిక సదుపాయాల కల్పన వంటి అంశాలపై నిరంతర పర్యవేక్షణ అవసరమని తెలిపారు. గ్రామీణ ప్రాంతాల్లో ప్రజలకు మెరుగైన సేవలు అందించేందుకు జిల్లా పంచాయతీ శాఖ చురుకైన పాత్ర పోషించాలని కోరారు.
నూతన బాధ్యతలు చేపట్టిన శ్రీ మల్లికార్జున రావు గారికి శుభాకాంక్షలు తెలియజేసిన చైర్‌పర్సన్ గారు, తన పదవీకాలంలో జిల్లాలో పంచాయతీరాజ్ వ్యవస్థ మరింత బలోపేతం కావడంతో పాటు గ్రామాల అభివృద్ధికి విశేష కృషి చేయాలని ఆకాంక్షించారు.
శ్రీ జి.వి.కె. మల్లికార్జున రావు గారు మాట్లాడుతూ, జిల్లాలోని గ్రామ పంచాయతీల అభివృద్ధికి, ప్రజలకు మెరుగైన సేవలు అందించేందుకు అంకితభావంతో పనిచేస్తానని తెలిపారు. ప్రజాప్రతినిధులు, అధికారులు, సిబ్బంది సమన్వయంతో ప్రభుత్వం నిర్దేశించిన లక్ష్యాలను సమర్థవంతంగా అమలు చేస్తానని పేర్కొన్నారు.