న్యూఢిల్లీ: మహిళలకు పార్లమెంటు, శాసనసభల్లో 33 శాతం రిజర్వేషన్ కల్పిస్తూ ప్రవేశపెట్టిన 131వ రాజ్యాంగ సవరణ బిల్లును లోక్సభ తిరస్కరించింది. 2029 నుంచి అమల్లోకి రావాల్సిన ఈ బిల్లుపై విస్తృత చర్చకు, సర్వపక్ష అభిప్రాయాలను సేకరించేందుకు ప్రభుత్వం విఫలమైంది. దీంతో అత్యంత ప్రతిష్ఠాత్మకమైన ఈ బిల్లు ప్రతిపక్షాల వ్యతిరేకతతో వీగిపోయింది.
వివిధ రాష్ట్రాల ఎన్నికల నేపథ్యంలో మహిళా ఓటర్లను ఆకట్టుకునేందుకు కేంద్రం చేసిన ఈ వ్యూహం ఎదురుదెబ్బ తగిలింది. ఈ బిల్లును ఇతర అంశాలతో ముడిపెట్టి, దేశ ప్రజలను మభ్యపెట్టే ప్రయత్నం విఫలమైనట్లు రాజకీయ విశ్లేషకులు అభిప్రాయపడుతున్నారు.
సాధారణంగా అమెరికా వంటి దేశాల్లో చట్టసభల్లో విస్తృత చర్చ, పరీక్షల అనంతరమే బిల్లులు ఆమోదం పొందుతాయి. కానీ భారత్లో కొంతకాలంగా అధికార పార్టీ నిర్ణయాలు అనేదే చట్టబద్ధమైనవిగా మారిపోయాయి. అయితే ఇటీవలి కాలంలో ఎన్నడూ లేని విధంగా ప్రభుత్వం తీసుకువచ్చిన బిల్లును లోక్సభ తిరస్కరించడం గమనార్హం.
ఇప్పటికే పలు రాష్ట్రాల్లో వరుస పరాజయాలు ఎదుర్కొంటున్న బీజేపీకి ఈ పరిణామం మరో శరాఘాతంగా మారింది. ప్రధాని వ్యక్తిత్వానికి ఉన్న ఆకర్షణ క్రమంగా తగ్గుముఖం పడుతున్న సందర్భంలో ఈ ఘటన జరిగింది. బిల్లు చర్చకు పెట్టడంలో ఎన్డీఏ ప్రభుత్వం చేసిన వ్యూహాత్మక తప్పిదాలే దీనికి కారణమని నిపుణులు అంటున్నారు.
ఈ పరిణామాల నేపథ్యంలో అదే వరుసలో రావాల్సిన మరో రెండు కీలక బిల్లులను వెనక్కి తీసుకుంటున్నట్లు ప్రభుత్వం ప్రకటించింది. వాటి భవిష్యత్తు అనిశ్చితంగా మారింది. దేశ రాజకీయాలను డీలిమిటేషన్ చుట్టూ మలుచుకునే ప్రయత్నాల మధ్య ఈ నిర్ణయం రాజకీయ వర్గాలను అయోమయంలో పడేసింది.
దేశ రాజకీయ ముఖచిత్రాన్నే మారుస్తామని బయలుదేరిన ప్రభుత్వం చివరికి పోరాడకుండానే ఆయుధాలు వదిలేసినట్లయింది. రాజకీయాలంటే కేవలం ఈవెంట్ మేనేజ్మెంట్ కాదని ఇప్పుడు కేంద్ర ప్రభుత్వానికి తెలిసి ఉంటుందని పరిశీలకులు వ్యాఖ్యానిస్తున్నారు. ఏ పార్టీకైనా చాలా అరుదుగా లభించే చారిత్రక అవకాశాన్ని చేజార్చుకున్న ప్రభుత్వంగా ఎన్డీఏ చరిత్రలో నిలిచిపోయే అవకాశం ఉంది.
