గ్యాస్ సంక్షోభం..! చిరు వ్యాపారుల జీవన పోరాటం తీవ్రం తరం..!!

గ్యాస్ కొరతతో హోటళ్లు మూత – కుటుంబ పోషణకే ఇబ్బందులు
క్రైమ్ అనాల్సిస్ – టీవీఎస్ ప్రకాష్, యలమంచిలి
యలమంచిలి పట్టణంలో గ్యాస్ కొరత తీవ్రమవడంతో చిరు వ్యాపారులు ఆందోళనలో మునిగిపోయారు. చిన్నహోటళ్లు, తోపుడు బండ్లు,టీ స్టాళ్లు వంటి చిన్న వ్యాపారాలపై ఈ సంక్షోభం గట్టి ప్రభావం చూపుతోంది. రోజువారీ ఆదాయంపైనే ఆధారపడే ఈ వర్గం, గ్యాస్ అందుబాటులో లేకపోవడంతో తీవ్ర ఇబ్బందులు ఎదుర్కొంటోంది.ప్రపంచవ్యాప్తంగా నెలకొన్న యుద్ధ పరిస్థితులు,ఇంధన సరఫరాలో అంతరాయం వంటి కారణాల ప్రభావం స్థానిక స్థాయిలో కూడా కనిపిస్తోంది. గ్యాస్ సిలిండర్ల సరఫరా తగ్గిపోవడం,ధరలు పెరగడం వల్ల చిన్న వ్యాపారుల పరిస్థితి మరింత దారుణంగా మారింది.ప్రత్యేకంగా ఇంటి వద్దే ఆహారం తయారు చేసి విక్రయించే మహిళలు, చిన్న వ్యాపారులు గ్యాస్ లేకపోవడంతో తమ వ్యాపారాలను తాత్కాలికంగా నిలిపివేయాల్సిన పరిస్థితి ఏర్పడింది. హోటళ్లలో వంటలు చేయలేకపోవడంతో కస్టమర్ల సంఖ్య కూడా తగ్గిపోతోందని వ్యాపారులు చెబుతున్నారు.“గ్యాస్ దొరకకపోతే మా బతుకు నిలవదు. ప్రతి రోజు సంపాదనతోనే కుటుంబాన్ని పోషిస్తున్నాం. గ్యాస్ లేకపోవడంతో అప్పులు కూడా పెరుగుతున్నాయి” అని పలువురు బాధితులు ఆవేదన వ్యక్తం చేస్తున్నారు.గ్యాస్ కొరత వల్ల కొందరు వ్యాపారులు కట్టెలు, బొగ్గు వంటి ప్రత్యామ్నాయాలను ఉపయోగించడానికి ప్రయత్నిస్తున్నా, అవి ఖరీదైనవిగా మారడంతో పాటు సమయం కూడా ఎక్కువ తీసుకుంటున్నాయని వారు చెబుతున్నారు. దీంతో వ్యాపార నిర్వహణ మరింత కష్టసాధ్యంగా మారింది.స్థానికంగా గ్యాస్ డీలర్ల వద్ద కూడా సరఫరా తగ్గిపోయిందని సమాచారం. అవసరానికి తగినంత సిలిండర్లు అందకపోవడంతో వ్యాపారులు రోజులు గడుపుతున్నారు. కొందరు సిలిండర్ల కోసం గంటల తరబడి వేచి ఉండాల్సిన పరిస్థితి ఉందని చెబుతున్నారు.ఇలాగే పరిస్థితి కొనసాగితే చిన్న వ్యాపారులు పూర్తిగా దెబ్బతినే ప్రమాదం ఉందని నిపుణులు హెచ్చరిస్తున్నారు. ఇప్పటికే కరోనా తరువాత కోలుకోలేని పరిస్థితిలో ఉన్న వ్యాపారులు ఇప్పుడు మరోసారి సంక్షోభాన్ని ఎదుర్కొంటున్నారు.ఈ నేపథ్యంలో వెంటనే చర్యలు తీసుకోవాలని స్థానిక అధికారులను వ్యాపారులు కోరుతున్నారు. గ్యాస్ సరఫరాను పెంచడంతో పాటు, అత్యవసరంగా చిన్న వ్యాపారులకు ప్రత్యేక కోటా కేటాయించాలని డిమాండ్ చేస్తున్నారు. అదేవిధంగా ప్రభుత్వం ఆర్థిక సహాయం, సబ్సిడీలు లేదా ప్రత్యామ్నాయ ఇంధనాలపై రాయితీలు ఇవ్వాలని విజ్ఞప్తి చేస్తున్నారు.ప్రభుత్వం తక్షణ చర్యలు తీసుకోకపోతే చిరు వ్యాపారుల జీవనోపాధి పూర్తిగా దెబ్బతిని, వారు రోడ్డున పడే పరిస్థితి తలెత్తుతుందని స్థానికులు ఆందోళన వ్యక్తం చేస్తున్నారు.