ముందస్తు జాగ్రత్తలు పాటించాలి.. మూడు రోజులకు సరిపడా మంచినీటిని నిల్వ చేసుకోవాలి: మున్సిపల్ కమిషనర్ ప్రసాద్ రాజు..!!
క్రైమ్ అనాల్సిస్ | టివియస్ ప్రకాష్ (స్పెషల్ రిపోర్టర్ ) :
అక్వాన్ తుపాను ప్రభావంతో బుధవారం నుంచి యలమంచిలి పరిసర ప్రాంతాల్లో అతి భారీ వర్షాలు కురిసే అవకాశం ఉన్నందున పురపాలక సంఘం పరిధిలోని ప్రజలందరూ అప్రమత్తంగా ఉండాలని మున్సిపల్ కమిషనర్ ప్రసాద్ రాజు సూచించారు. ఈ మేరకు మంగళవారం విడుదల చేసిన పత్రికా ప్రకటనలో తుపాను ప్రభావాన్ని దృష్టిలో ఉంచుకుని ప్రజలు ముందస్తు జాగ్రత్తలు తీసుకోవాలని కోరారు.మూడు రోజులకు సరిపడా మంచినీటిని నిల్వ చేసుకోవాలి తుపాను ప్రభావంతో ఈదురుగాలులు, భారీ వర్షాలు కురిసే అవకాశం ఉందని, దీనివల్ల విద్యుత్ సరఫరాతో పాటు మంచినీటి సరఫరాకు అంతరాయం ఏర్పడే ప్రమాదం ఉందని కమిషనర్ తెలిపారు. అందువల్ల ప్రజలు రేపటి నుంచి కనీసం మూడు రోజులకు సరిపడా మంచినీటిని ముందుగానే నిల్వ చేసుకోవాలని సూచించారు. నీటిని పొదుపుగా వినియోగిస్తూ వృథా చేయకుండా జాగ్రత్తలు పాటించాలన్నారు.విద్యుత్ కోతలను దృష్టిలో ఉంచుకుని జాగ్రత్తలు తుపాను సమయంలో విద్యుత్ సరఫరా నిలిచిపోయే అవకాశం ఉన్నందున ప్రతి ఒక్కరూ తమ మొబైల్ ఫోన్లను పూర్తిస్థాయిలో ఛార్జింగ్ చేసుకోవాలని, అవసరమైనన్ని కొవ్వొత్తులు, ఇతర అత్యవసర వస్తువులను ముందుగానే సిద్ధం చేసుకోవాలని సూచించారు.అత్యవసరమైతే తప్ప బయటకు రావద్దు భారీ వర్షాలు కురిసే సమయంలో అత్యవసర పరిస్థితులు మినహా ప్రజలు ఇళ్ల నుంచి బయటకు రావద్దని కమిషనర్ విజ్ఞప్తి చేశారు. ఈదురుగాలుల కారణంగా చెట్లు నేలకొరిగినా, విద్యుత్ స్తంభాలు దెబ్బతిన్నా, విద్యుత్ తీగలు తెగిపడినా వాటికి దూరంగా ఉండాలని, వెంటనే సంబంధిత అధికారులకు సమాచారం అందించాలని కోరారు.
అత్యవసర సహాయం కోసం సంప్రదించాల్సిన నంబర్లు
తుపాను సమయంలో ప్రజలకు ఎలాంటి అత్యవసర పరిస్థితులు ఎదురైనా కింది అధికారులను సంప్రదించాలని పురపాలక సంఘం సూచించింది.
1. తహసీల్దార్ – 8332814737
2. మున్సిపల్ కమిషనర్ – 9618496973
3. ఎస్ఐ, యలమంచిలి టౌన్ – 9440796103
4. ఎస్ఐ, యలమంచిలి రూరల్ – 9440796104
5. ఏపీ ట్రాన్స్కో అసిస్టెంట్ ఇంజనీర్ – 9440812542
6. అగ్నిమాపక అధికారి – 9885377236
తుపాను హెచ్చరికల నేపథ్యంలో ప్రజలు ఎలాంటి నిర్లక్ష్యం చేయకుండా అధికారుల సూచనలు పాటించాలని, ముందస్తు జాగ్రత్తలతో కుటుంబ సభ్యుల భద్రతకు ప్రాధాన్యత ఇవ్వాలని మున్సిపల్ కమిషనర్ ప్రసాద్ రాజు విజ్ఞప్తి చేశారు.