విద్యుత్ షార్ట్ సర్క్యూట్‌తో పూరిల్లు దగ్ధం..!

విద్యుత్ షార్ట్ సర్క్యూట్‌తో పూరిల్లు దగ్ధం..!

10/November/2026 09:41    Share:   

నిరుపేద కుటుంబానికి తీరని నష్టం.. రూ.1.50 లక్షల ఆస్తి బూడిదపాలు..!!
 
90 ఏళ్ల వృద్ధ తల్లితో జీవనం సాగిస్తున్న నారాయణమ్మకు కష్టాలే మిగిలాయి..!!!
 
 ( క్రైమ్ అనాలసిస్ – టీవీఎస్ ప్రకాష్ ):
 
అనకాపల్లి జిల్లా యలమంచిలి మున్సిపాలిటీ పరిధిలోని 26వ వార్డు పెద్దపల్లి గ్రామంలో సోమవారం మధ్యాహ్నం చోటుచేసుకున్న అగ్నిప్రమాదం ఓ నిరుపేద కుటుంబాన్ని రోడ్డున పడేసింది. విద్యుత్ షార్ట్ సర్క్యూట్ కారణంగా సంభవించిన అగ్నిప్రమాదంలో ఒక పూరిల్లు పూర్తిగా దగ్ధమై, ఇంట్లోని వస్తువులన్నీ కాలి బూడిదయ్యాయి. ఈ ఘటనతో బాధిత కుటుంబం తీవ్ర ఆవేదనకు గురైంది.
 
వృద్ధ తల్లితో ఒంటరి జీవనం..
 
స్థానికుల వివరాల ప్రకారం.. పెద్దపల్లి గ్రామానికి చెందిన నారాయణమ్మ తన 90 సంవత్సరాల వృద్ధ తల్లితో కలిసి జీవనం సాగిస్తోంది. భర్త లేకపోవడంతో కుటుంబ బాధ్యతలన్నీ ఆమెపైనే ఉన్నాయి. వృద్ధాప్యంలో ఉన్న తల్లికి సేవలు చేస్తూ, తనకున్న కొద్దిపాటి ఆదాయంతో కుటుంబాన్ని పోషించుకుంటోంది. ఇలాంటి పరిస్థితుల్లో విద్యుత్ షార్ట్ సర్క్యూట్ రూపంలో వచ్చిన ప్రమాదం ఆమె కుటుంబాన్ని తీవ్ర విషాదంలోకి నెట్టింది.
 
కళ్లముందే కాలిబూడిదైన సర్వస్వం..
 
మధ్యాహ్న సమయంలో ఇంట్లో విద్యుత్ షార్ట్ సర్క్యూట్ జరగడంతో ఒక్కసారిగా మంటలు చెలరేగాయి. చూస్తుండగానే మంటలు పూరిల్లు అంతటా వ్యాపించాయి. స్థానికులు మంటలను అదుపు చేసేందుకు ప్రయత్నించినప్పటికీ మంటల తీవ్రత అధికంగా ఉండటంతో ఇల్లు పూర్తిగా దగ్ధమైంది. ఇంట్లో ఉన్న బట్టలు, వంట సామగ్రి, నిత్యావసర వస్తువులు, తినడానికి దాచుకున్న ఆహార ధాన్యాలు సైతం అగ్నికి ఆహుతయ్యాయి.
 
ఈ ప్రమాదంలో సుమారు రూ.1 లక్షా 50 వేల వరకు ఆస్తి నష్టం వాటిల్లినట్లు బాధితులు అంచనా వేస్తున్నారు. అదృష్టవశాత్తూ ఎలాంటి ప్రాణనష్టం జరగకపోవడంతో అందరూ ఊపిరి పీల్చుకున్నారు.
 
సంఘటనా స్థలానికి అగ్నిమాపక సిబ్బంది..
 
అగ్నిప్రమాదం గురించి సమాచారం అందుకున్న అగ్నిమాపక శాఖ సిబ్బంది రాంబాబు ఆధ్వర్యంలో సిబ్బంది హుటాహుటిన సంఘటనా స్థలానికి చేరుకుని మంటలను అదుపు చేశారు. అయితే అప్పటికే పూరిల్లు పూర్తిగా దగ్ధమైపోయింది.
 
కట్టుబట్టలతో మిగిలిపోయిన నారాయణమ్మ కుటుంబాన్ని ఆదుకోవాలని స్థానికులు కోరుతున్నారు. 90 ఏళ్ల వృద్ధ తల్లిని పోషించుకుంటూ జీవనం సాగిస్తున్న నిరుపేద మహిళకు ఇలాంటి పరిస్థితి ఎదురుకావడం స్థానికులను కలచివేసింది.
 
సంబంధిత రెవెన్యూ అధికారులు, ప్రజాప్రతినిధులు వెంటనే స్పందించి అగ్నిప్రమాదంపై విచారణ జరిపి నష్టాన్ని అంచనా వేయడంతో పాటు బాధిత కుటుంబానికి తక్షణ ఆర్థిక సహాయం, పునరావాస సదుపాయాలు కల్పించాలని గ్రామస్తులు కోరుతున్నారు.
 
నిరుపేద కుటుంబానికి ప్రభుత్వం మానవతా దృక్పథంతో అండగా నిలవాలని స్థానికులు విజ్ఞప్తి చేస్తున్నారు.
Breaking News

Subscribe our Newsletter