రాంబిల్లి: శ్రావణ మాసం మూడవ శుక్రవారం, రాఖీ పండుగ మరియు జంధ్యాల పౌర్ణమి కలయిక సందర్భంగా శ్రీదేవి భూదేవి సమేత శ్రీ వల్లభ నారాయణ స్వామి ఆలయంలో విశేష ఆధ్యాత్మిక కార్యక్రమాలు, సామూహిక వరలక్ష్మి వ్రత పూజలు అత్యంత వైభవంగా, భక్తిశ్రద్ధల నడుమ ముగిశాయి.
ఈ మహా వేడుకల సందర్భంగా ఆలయ అర్చకులు నేతేటి గోపాలకృష్ణమాచార్యులు ఆధ్వర్యంలో ఉదయం 09:30 గంటలకు వేద మంత్రోచ్చారణలు, మంగళవాయిద్యాల నడుమ పూజా కార్యక్రమాలు శాస్త్రోక్తంగా ప్రారంభమయ్యాయి. స్వామివారికి, అమ్మవార్లకు విశేష తిరుమంజనం, అలంకారాలు నిర్వహించిన అనంతరం భక్తులందరి చేత సామూహిక వరలక్ష్మి పూజలను అత్యంత భక్తిప్రపత్తులతో జరిపించారు. అర్చకులు గోపాలకృష్ణమాచార్యులు పూజా విధానాన్ని, ఈ పర్వదినం యొక్క ప్రాశస్త్యాన్ని భక్తులకు వివరంగా తెలియజేశారు.
ఈ విశేష పూజల్లో పాల్గొనేందుకు ఉదయం నుంచే విశేష సంఖ్యలో మహిళలు, భక్తులు ఆలయానికి తరలివచ్చారు. ఆలయ ప్రాంగణమంతా గోవింద నామస్మరణలతో, మంత్రోచ్ఛారణలతో మారుమోగి ఆధ్యాత్మిక వాతావరణం సంతరించుకుంది. వ్రత పూజలు పూర్తి చేసుకున్న భక్తులకు ఆలయ అర్చకులు వేద ఆశీర్వచనాలు అందించి, తీర్థప్రసాదాలు పంపిణీ చేశారు. స్థానిక భక్తులు అధిక సంఖ్యలో పాల్గొని స్వామి, అమ్మవార్లను దర్శించుకుని కృపాకటాక్షాలు పొంది తరించారు. ఆలయ యాజమాన్యం మరియు నిర్వాహకులు భక్తులకు ఎలాంటి అసౌకర్యం కలగకుండా ప్రత్యేక ఏర్పాట్లు చేసి, ఈ కార్యక్రమాన్ని దిగ్విజయంగా పూర్తి చేశారు.
