రాంబిల్లి: విద్యార్థుల భద్రతను మరింత బలోపేతం చేయడంలో భాగంగా స్థానిక జెడ్పీ హైస్కూల్లో ‘అభయ బాక్స్’ను ఏర్పాటు చేశారు. ఈరోజు పరవాడ డీఎస్పీ మోహన్ రావు గారు, రాంబిల్లి పోలీస్ స్టేషన్ సిబ్బంది, మరియు అభయ టీమ్ సభ్యులు సంయుక్తంగా పాఠశాలను సందర్శించి ఈ కార్యక్రమాన్ని చేపట్టారు.ఈ సందర్భంగా పాఠశాల ప్రాంగణంలో కొత్తగా ఏర్పాటు చేసిన అభయ బాక్స్ ఉద్దేశ్యాన్ని, దాని వినియోగ విధానాన్ని విద్యార్థులకు అధికారులు వివరించారు. విద్యార్థులు తమకు ఎదురయ్యే ఎలాంటి సమస్యలు, ఇబ్బందులు లేదా భద్రతకు సంబంధించిన అంశాలనైనా ఎలాంటి భయాందోళనలు లేకుండా ఈ బాక్స్ ద్వారా తెలియజేయవచ్చని స్పష్టం చేశారు.అనంతరం పోలీస్ అధికారులు, అభయ టీమ్ సభ్యులు విద్యార్థులతో ముఖాముఖి మాట్లాడారు. వ్యక్తిగత భద్రత, అపరిచిత వ్యక్తుల పట్ల అప్రమత్తంగా ఉండటం, ఏదైనా సమస్య ఎదురైనప్పుడు వెంటనే ఉపాధ్యాయులకు లేదా పోలీసులకు సమాచారం అందించడం వంటి కీలక అంశాలపై అవగాహన కల్పించారు. విద్యార్థులకు సురక్షితమైన, భద్రమైన మరియు స్నేహపూర్వక వాతావరణాన్ని కల్పించడమే ఈ ‘అభయ బాక్స్’ ఏర్పాటు ప్రధాన ఉద్దేశ్యమని అధికారులు ఈ సందర్భంగా తెలియజేశారు.
